A Xunta destaca en San Cibrao das Viñas a aposta das pemes galegas por impulsar a súa transformación industrial a través de proxectos de dixitalización

 

  • O director do Igape, Fernando Guldrís, visita as instalacións de Lacados Digoín, empresa especializada en lacados e recubrimentos especiais que ten impulsado un sistema modulable de tratamento e pintura co apoio do programa de dixitalización Industria 4.0 promovido pola Administración autonómica.
  • Lembra que está aberta unha nova convocatoria desta liña, que suma 5 M€ para a posta en marcha de sistemas de fabricación distribuída, de facturación ou de procesos entre un líder industrial cara ás empresas da súa cadea de valor.

O director do Igape, Fernando Guldrís, visitou onte no polígono de San Cibrao das Viñas as instalacións de Lacados Digoín, empresa especializada en lacados e recubrimentos especiais que ten impulsado un sistema modulable de tratamento e pintura co apoio do programa de dixitalización Industria 4.0 promovido pola Administración autonómica. Unha liña, afondou, que busca promover a transformación industrial das pemes galegas a través de proxectos de dixitalización.

Neste contexto, Guldrís lembrou que está aberto o prazo de presentación de solicitudes da nova convocatoria deste programa, que suma 5 M€ de orzamento, aspirando a apoiar este ano arredor de 200 novas iniciativas. Así, afondou o director do Igape, a liña facilita a posta en marcha de sistemas de fabricación distribuída, de facturación ou de procesos entre un líder industrial cara ás empresas que conforman a súa cadea de valor; ou proxectos individuais cara á dixitalización e conectividade da peme.

Esta é a oitava convocatoria do programa, que conta cunha ampla demanda desde o seu arranque en 2018, mobilizándose ata o de agora preto de 3 M€ na provincia de Ourense, impulsando a reactivación do tecido produtivo local a través da transformación tecnolóxica e o impulso aos procesos de dixitalización.

O programa de dixitalización Industria 4.0 cobre o 35 % dos investimentos materiais e inmateriais subvencionables para as pequenas empresas, e o 25 % para as medianas, así como o 50 % dos gastos en colaboracións externas en ambos os casos.