Desde Exportou queremos trasladar os nosos parabéns ás entidades da provincia que resultaron beneficiarias na proposta provisional de resolución da convocatoria de subvencións promovida polo Instituto Ourensán de Desenvolvemento Económico (INORDE) para o financiamento de accións de dinamización e promoción do comercio local durante o ano 2026.
Estas axudas teñen como finalidade apoiar iniciativas impulsadas por asociacións de comerciantes e entidades empresariais que contribúan a reforzar o comercio de proximidade, incentivar o consumo local e dinamizar economicamente vilas e cidades da provincia.
Entidades beneficiarias
Segundo a proposta provisional publicada, as entidades beneficiarias son:
- Asociación de Comerciantes e Empresarios de Maceda
- Asociación Empresarial de Valdeorras (AEVA)
- Asociación de Empresas e Comercios Prolimia
- Asociación de Floristas da Provincia de Ourense (AFLOR)
- Asociación de Empresarios de Verín
- Asociación de Comerciantes, Empresarios e Profesionais do Centro Comercial Aberto de Ourense
- Asociación de Comerciantes e Industriais da Praza de Abastos nº1 de Ourense
- Asociación de Jóvenes Empresarios de Ourense
Impulso ao comercio local e ao tecido empresarial
As accións subvencionadas permitirán desenvolver campañas comerciais, actividades de promoción, iniciativas de fidelización de clientes, eventos e outras actuacións destinadas a mellorar a competitividade do pequeno comercio e a atraer consumo cara aos negocios locais.
O comercio de proximidade representa un elemento esencial para a economía ourensá, xerando emprego, servizo, cohesión social e vida nos nosos municipios. O apoio ás asociacións empresariais e comerciais resulta clave para continuar avanzando nun modelo económico máis dinámico e sostible.